Мин – Гыйбадуллина Ильмира Габделхак кызы. Педагогик  стажым- 29 ел. Югары квалификацияле башлангыч сыйныф укытучысы.

Бүгенге көндә мин Д.Г.Хәкимов исемендәге Түбән Мәтәскә гомуми урта белем мәктәбендә башлангыч сыйныфларны укытам. Укучыларымны бик яратам, алар да мине хөрмәт итәләр. Без алар белән төрле бәйрәмнәр, кичәләр үткәрәбез, район, республика бәйгеләрендә катнашабыз. Ата-аналар да безнең зур ярдәмчеләребез. Алар белән уртак тел табып эшләве үзе рәхәт. Сыйныф җитәкчесе буларак “Милли гореф-гадәтләребез аша әхлаклы, намуслы һәм дус коллектив туплау” дигән проблема өстендә эшлим. Бу тема бүгенге көндә дә актуаль проблемаларның берсе булып тора. Үз эшемдә төп максат итеп, укучыларны һәр яктан да шәхес итеп милли рухта  тәрбияләүне, аларны чын кешеләр итеп үстерүне, кешеләр арасында үз урынын табарга өйрәтүне куям. Шушы максаттан чыгып, төрле бурычлар билгеләдем:

1. Укучыларны чын кеше итеп тәрбияләү.
2. Укучыларда әхлак сыйфатлары тәрбияләү.
3. Балаларның иҗади сәләтләрен, аралашу осталыгын арттыру.

Шулай ук эшемдә түбәндәге принципларга таянам:

1. Һәр тәрбияләнүчегә кабатланмас шәхес итеп карау.
2. Һәрбер укучыны кеше буларак хөрмәт итү.
3. Укучыларга карата ышаныч белдерү.
4. Максат кую һәм аңа ирешү.
5. Үз-үзеңә һәм тирә-якка ихтирамлы булу.
6. Укучыларның иң якын кешесенә әверелү.